Uppe was weer woelig in Afrikaans einde verlede maand! Een van ons kliënte, Afrikaans.com, het ’n klein dorpie in die Wes-Kaap, genaamd Pniel, opgehelder met hul verfkwasse tydens die jaarlikse Muurkunsprojek.

Afrikaans.com het hande gevat met die Pniel Erfenis en Kultuur Trust en besluit om die Adam Small-fees na verskeie skole te neem. Dit was ’n wonderlike geleentheid vir die skole in Pniel om te spog met hul muurkunswerke. Die leerders is ook vermaak deur die rymkletser en ambassadeur vir Afrikaans.com, HemelBesem.

Afrikaans.com se hande en voete by dié geleentheid was René Arendse. Volgens René is die Muurprojek veral spesiaal omdat dit ’n mate van hoop bied.

“Hierdie muurskildery sal nog jare lank ’n blyk van hoop en inspirasie bly…’n skildery wat die leerders, onderwysers en die gemeenskap sal herinner om uit te styg bo hulle omstandighede, groot te droom en trots te wees op hulle taal en identiteit,” sê sy.

Die geleentheid is ook moontlik gemaak deur samewerking met verskeie vennote insluitend Vriende van Afrikaans (’n afdeling van die ATKV), SASNEV (Suid-Afrikaanse Sentrum vir Nederlands en Vlaandere), die Moedertaalinisiatief-projek en ambassadeurs vir Afrikaans.com.

Vir meer inligting oor dié geleentheid, klik hier.